ꋍ

ꄎꌬꀕ

ꄎꌬꀕ

ꄎꌬꀕꃅꉢꈨꇁꇬꎷ

ꍩꄿꆼꁠꏦꌠꉬꄿꂿ

ꇊꃀꐂꇓꀵꌠꉬꄿꂿ

ꌩꈪꇁꄉꌌꌠꉬꄿꂿ

ꁯꋒꐯꑎꉒꐎꐰꆹꄮꇬ

ꒌꆠꃅꄂꁿꆹꇬꎷ

ꑍ

ꑳꉎꌿꌺꀍꄟꅑꄮꇬ

ꑳꐮꒈꌺꑘꀕꉙꄮꇬ

ꑳꅶꐛꑿꇖꈭꀕꄮꇬ

ꌠꑊꅉꄜꋍꃅꄜꇬꎷ

ꀘꂾꌎꑻꋍꃅꋍꃅꀕꇬꎷ

ꉒꈌꇂꃴꃰꊿꆹ——

ꐥꋊꁮꅉꌌꇁꋧꃅꄜꆹꂯ

ꌕ

ꉒꐎꐰꁧꂯꄮꇬ

ꃰꊿꉪꐨꀉꄹꀕꃅꅔꅐ

ꎲꑌꌠꉬꄿꂿ

ꎼꃏꌠꉬꄿꂿ

ꐯꇯꃬꃹꃅꃹꇬꀀ

ꇖ

ꃅꃴꄁꆈꈩꄟꄷꑌ

ꊿꆅꉌꃀꊿꆅꑌꇬꎷ

ꉬ

ꉒꈌꇂꃴꃰꊿꏣꉂꑞꈜ

ꁮꑘꃀꑟꏍꃅꏍ

ꃬꏿꐎꊂꃰꊿꉌꃀꑋꑌꌦ

ꌦꆈꉐꊰꀀꄗꑓꊴꐺꀕꌦ

ꊾꉻꊾꑭꐆꄹꉇ

ꏦꏪꇓꂃꄓꃅꄓꑌꌬꀋꄿ

ꃘ

ꉡꆹꃅꍋꌌꇁꃆꇭꃅꃨꋩꂿꇊ

ꏢꐎꇁꄿꃆꇭꏭꃰꏿꄮ

ꆗꇁꋍꑍꀄꂼꂻꐛꇁꇬꎷ

ꉡꆹꇁꄉꌌꇁꇌꉘꇌꎶꄀꂿꇊ

ꀊꈚꅔꄧꇌꉘꇌꎶꏭꃰꏿꄮ

ꏀꇁꋍꑍꃄꎭꇂꁮꑓꐛꇁꇬꎷ

ꏃ

ꄎꌬꀕꃅꉢꁳꋍꇬꇴꎻꇊ

ꉒꈌꇂꃴꈌꃅꈌꃨꉢꄝꂮꐚꏭꐛꀐ

ꐝꍠꀕꃅꉢꁳꋍꇬꀱꎻꇊ

ꀉꂿꑍꐎꂊꊫꀕꌠꉢꄝꂋꁧꏭꐛꀐ

ꈧꊰꀕꃅꉢꁳꋍꇬꅲꎻꇆ

ꀉꁌꁮꅉꉢꀵꍩꄿꆼꁠꏦꌠꊜꑌꌬꀋꄿ

ꉆ

ꉒꈌꇂꃴꉒꐎꀰꑐꀕ

ꑌꑿꆿꌌꐆꑻꀺꌠꉬꑌꉆ

ꃬꎶꀉꐩꌌꇁꀕꄿꇷꁨꊐꌠꉬꑌꉆ

ꏃꃅꈊꇁꄮꇬ

ꏹꋭꈧꌠꃰꊿꏹꇁꅡꀯꇉꂾꎭꄡꑟ

ꈬ

ꀀꍹꈄꀕꉢꌋꐗꈭꐨ

ꉒꈌꇂꃴꃰꐛꆈꁌꀕꑠꉔ

ꀉꉌꈍꑋꐻꎵꌦꅅꈨ

ꊰ

ꏃꃅꉬꉎꉐꊰꇁꌠꉬꑌꉆ

ꃰꎞꊰꑋꑟꌠꒌꆠꉐꈎꇁꌠꉬꑌꉆ

ꃅꃴꃄꅉꏣꇁꑞꄜꐥꄮꇬ

ꐷꈬꃅꇴꃴꑐꀕ

ꒉꉗꅿꁮꋌꅿꋍꃅꅿꑴꌦ

ꊯꊪ

ꀉꄉꎵꃀꃬꏿꎬꂿꄷ

ꀉꂿꉌꉩꅇꄸꇳꂿꄷ

ꃅꉒꃴꇁꉐꊰꐛꋍꑍ

ꁦꀑꃰꐎꁴꍂꃅꐚꄓꃅꄓ

ꊯꑋ

ꉒꈌꇂꃴꂾꃚꁧꇂꇉꉺꐺꇬꎷ

ꐕꇁꉺꍯꐛꑿꈴꃅꈳꄮꇬ

ꃆꃀꇇꏫꌺꇗꌦꅅꈨ

ꊯꌕ

ꀉꂿꅇꉉꂷꋶꒉꌠꉢꎺꑌ

  ꀉꂿꀯꃶꎭꃶꅩꌺꇇꄭꄮꀋꐚ

ꀉꄉꅇꉉꎸꇺꋯꌠꉢꎺꑌ

ꀉꄉꌩꈪꇁꄉꉢꌌꃅꅪꀱꄎꀕꀋꐚ

ꊯꇖ

ꉒꈌꇂꃴꃰꊿꇊ

ꆏꁳꃆꇭꃅꃨꋩꄉ

ꈭꎴꈜꎴꅉꇬꋚꎷꒉꈹꁧꑌꄿ

ꆏꁳꌩꈪꆼꁠꏦꄉ

ꑳꉎꁍꑗꋚꈁꊩꑌꄿ

ꆏꁳꏦꀨꉊꈯꄌꌊ

ꌩꈉꌩꏓꆹꑌꄿꑴꇊ

ꊯꉬ

ꉢꁦꀑꉒꈌꉆꄉ

ꉂꇂꑟꅅꄜꂯꑌ

ꅇꀨꇬꀋꐊ

ꉢꆺꑳꏂꃴꑌꄉꁀꁻꈷꂯꑌ

ꅇꉙꉢꄝꆘꅝꃲ

ꊰꃘ

ꍑꆹꍑꑲꆏ

ꉢꁦꀑꉒꈌꊱꆺꀮꅉꇬꉆꄉ

ꁡꇤꈌꃮꂾꃚꊼꇅꅱꌦꂿ

ꉻꈫꑾꌺꂾꃚꊼꇅꅱꌦꂿ

ꃪꄧꍶꌺꀆꅉꊼꇅꅱꌦꂿ

ꊰꏁ

ꂾꆹꂿꐙꐚꇊ

ꉲꌦꉼꉹꂢꌠꂿꐙꐚ

ꅙꁧꃅꇴꋊꌠꂿꐙꐚ

ꃅꃴꄂꐎꌉꈿꁻꏤꁧꌠꆏꂾꂿ

ꀋꁭꊰꇉꊴꃀꐜꅪꍩꃚꈨꋺꋻ

ꊰꉆ

ꊖꑳꉢꀀꇊꂶꌠ

ꎷꑌꃆꄔꉢꇤꇫꏦꄉ

ꈊꑌꃆꄔꉢꇤꇫꏦꄉ

ꃆꄔꉐꆂꇇꒃꌠꐜꀋꈨ

ꊯꈬ

ꉒꈌꇂꃴ

ꃄꅉꉢꌌꂒꋉꄉꍇꌠ

ꀋꎺꉈꉩꀕ

ꑾꌺꉢꄝꄚꄉꆘꅝꋺ

ꀃꑍꋍꄮ

ꑾꌺꀉꐩꐯꇯꐤꑌꌬꀋꄿ

ꑍꊏ

ꉒꈌꇂꃴ

ꇪꀮꉈꏭꂾꄮꇬ

ꀉꑳꋚꈁꀋꊌꑌ

ꊫꂫꋚꇗꄡꇗꀀꅉꀀꇬꎷ

ꑍꊏꋋ

ꁡꇤꈌꃮꌨꎓꀕꑠꉔ

ꌧꅗꁧꑭꂷꇭꌥꌦꄓꌦꃅ

ꀉꄉꎧꑱꃱꐚꅹꀋꉬ

ꎬꐚꂸꂷꉬꇮꈛꁘꇊꐨꁮ

ꑍꊏꑋ

ꌠꑊꇰꋒꈍꃅꅥꄿꂿ

ꁦꀑꉒꏹꉒꏣꐥꇬꎷ

ꃰꊿꃰꐞꑐꇁꌠꉫꑌꉆ

ꃰꐛꑋꈌꁏꇁꌠꉫꑌꉆ

ꃅꄜꌟꃅꄜꃅꈊꌟꃅꈊꇬꎷ

ꑍꊎꌕ

ꀋꏦꇊ

ꄯꆳꃬꄌꇁꑌꀋꏦꇊ

ꆿꅪꑿꄚꇁꑌꀋꏦꇊ

ꂵꉌꊖꋠꇁꑌꀋꏦꇊ

ꃰꊿꈐꉘꐰꇑꀀꅉꀀꑴꌦ

ꑋꈌꁏꊂꀄꂼꂻꐛꇁꄡꑟ

ꑍꊎꇖ

ꉒꈌꇂꃴ

ꊨꃀꇇꈡꉢꄌꌊ

ꀉꁌꑭꐨꎹꄉ

ꀋꁧꈳꏦꎹꄉ

ꊫꂫꁤꇅꀕꌠꉢꌐꄉꆹꂿꄷꑴꌦ

封面ai图片设计：吉潘木乃

背景音乐ai制作：吉潘木乃